Novas Aristanesas, chenàbura 25 de mese de ledàmene de su 2024
S’isparghet sa retza de is pistas pro is bitzicletas in provìntzia de Aristanis – Creschet ancoras sa retza pro bitzicletas in sa provìntia de Aristanis e creschent rugas e àteros logos pro caminare in is comunes de sa costera. In Crabas s’incurtzant is tempos pro fàghere sa pista pro bitzicletas chi ponet in relata cun Santu Giuanne de Sinis: is traballos ant a cumentzare a primìtzios de ocannu chi benit. Su finantziamentu arribat dae su PNRR e intrat in su progetu de sa bia manna pro bitzicletas de Sardigna. In prus, su Comunu tenet in disìgiu de pònnere in seguresa puru duas incrugadas malas de sa ruga provintziale nùmeru ses, cara a Maimoni e Funtana Mèiga. Ant domandadu duos e mesu milliones de èuros a s’Assessoradu regionale a is Traballos pùblicos pro sos isterrimentos e pro megiorare sa seguresa.
In Terraba, imbetzes, sunt acanta de acabbare is traballos pro sa ruga de is bitzicletas chi at a unire su tzentru de sa bidda cun su tzentru de isport “Remìgio Corda”; pro custa faina ddoe ant postu unu millione de èuros de dinari de sa Regione. Longa unu chilòmetru, sa biighedda pro bitzicletas at a cùrrere acanta de s’istrada provintziale chi portat a s’istrada istatale 131, sa Carlo Felice, finas a su tzentru in localidade Narbonis. “S’impresa est cuncordende s’illuminatzione”, at decraradu su vitzesìndigu e assessore a is Traballos pùblicos, Andrea Grussu; “a pustis at a sighire cun su cuncordu de is signales istradales e s’at a fàghere totu su chi serbit siat a s’istrada, siat a sa pista pro is bitzicletas”.
Novas fintzas in Bosa, in ue ddoe ant abertu unu parchègiu a pranos meda, in sa parte de Santa Justa, semper prus acanta. A pustis de binti annos de isetu e dibatas, sa faina dd’ant a acabbare. S’Amministratzione comunale, difatis, at donadu s’incàrrigu de sa progetatzione e de sa diretzione de is traballos pro acabbare s’òpera.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
