Bive BarGuì – Me in is leadas de Barigadu e de Guiltzier, su 30 de su mese de cabudanni passadu, in Ilartzi, est cumentzadu unu progetu de isvilupu de su logu: “Bive BarGuì – Comunidade, Esperièntzia e Àndalas a inghìriu de su lagu Omodeo”.
A sa mesa de mòvida de megioramentu, ddoe fiant sètzidos su vitze-presidente regionale e
assessore de sa Programmatzione, Giuseppe Meloni, impare a is sìndigos de 18 comunos de su logu e a is rapresentantes de su partenariadu econòmicu-sotziale, de su setore privadu de sa sotziedade tzivile.
Su progetu, pro èssere pretzisos, punnat a acabbare sos interventos marcados me in su primu acòrdiu de programma postu a cùrrere in su 2018, ma non petzi. Intra de custas punnas ddoe sunt is fainas de avaloramentu de su logu e su megioramentu de is problemas suos, cun sa tarea de lòmpere a unu turismu sostenibile, siat ambientale siat culturale e sotziale.
In prus si punnat a fraigare una retza de infrastruturas pro donare una ghetada de manu a is servìtzios turìsticos de primore, cun s’afortiamentu de is servìtzios pro su bene istare de sa gente e s’acomunamentu cunforma a giòvanos e famìllias; si previdet fintzas s’afortiamentu de is servìtzios sotziales pro antzianos e antzianas e pro is categorias in dificultade e de sa governance de su logu puru.
Sa sienda de su meledu est, duncas, s’acomunamentu sotziale e sa cooperatzione econòmica chi allegant a manera profetosa cun àteros atores, pro parare fronte a is apretos berdaderos de su logu.
In s’ùrtimu addòbiu, ant allegadu de s’ismenguamentu de su nùmeru de is pessones e de is
maneras pro agatare solutziones a custu fatu e de “una programmatzione sèria e de calidade, cunforma a su chi serbit diaveras a is territòrios, chi potzat donare un’agiudu firmu e balente”, comente at naradu s’assessore Meloni.
“Amus ascurtadu sa boghe de sa comunidade”, acabbat s’assessore, “pro pòdere definire is fainas noas de pònnere a cùrrere cun is finantziamentos de s’Otimizatzione, averiguende sos elementos crìticos, pro assentare e megiorare sa caminera gràtzias a sa semplificatzione e a sa digitalizatzione”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
