Is apuntamentos de custa coa de chida in provìntzia de Aristanis – Custa coa de chida puru at a èssere rica meda de apuntamentos in provìntzia de Aristanis. In Pompu ddoe faghent sa de bator editziones de Fromentu bread experience, sa festa dedicada a su pane. Domìnigu a mangianu s’abertura de sa manifestatzione: a prus de is sabores antigos e de is fainas esperientziales, ddoe ant a èssere fintzas s’ispetàculu de is màscheras de is Boes e Merdules de Otzana e mùsica e ispàssiu cun is Lapola e su Tamurita Show. Prevìdida fintzas una gara de arrepentina, una faina culturale – custa – cuncordada dae s’Unione de is Comunes de Parte Montis a manos de pare cun su Comune e sa Biblioteca de Pompu, a tenore de unu progetu finantziadu dae su Servìtziu “Limba e Cultura sarda” de sa Regione cun s’Avisu Tu.Li.S. 2023. Su cuncordu de Fromentu bread experience ddu contivìgiant su Comune de Pompu, sa Pro Loco e su Museu multimediale “Domo de su pane”.
Festa manna fintzas in Arborea cun sa de 41 editziones de sa “Sagra de sa pulenta”, cuncordada dae sa Pro Loco ghiada dae Paolo Sanneris. Si cumentzat sàbadu a merie in sa crèsia de su Redentore Santu cun unu cuntzertos de coros e cun is tastaduras de is màndigos fatos cun pulenta. Sa die in fatu si cumentzat a mangianu chitzo e s’at a tirare fintzas a tardu, cun mùsica, ispetàculos e àteros addòbios.
In Aristanis, imbetzes, sa loba de artistas formada dae Paolo Pontillo cun su clarinete e Gregorio Corcione cun su pianoforte at a sonare sàbadu in su Museu diotzesanu pro su de bator apuntamentos de sa de XV Rassignas “Domìnigu in cuntzertu” 2024, cuncordada dae s’Ente pro is Cuntzertos. Semper sàbadu, ma in sa pratza de is Boes, in s’àndala de Dromos e de s’arte cuntemporànea, cumentzat un’àtera mustra: “KOLOSSÒI. Pastoreddu in s’Ìsula de is Gigantes” e s’ispetàculu musicale “S’istimare, Non s’istimare” de sa cambarada Aristanea in bia de Filippo Mameli, 13.
In Donigala, domìnigu, a intro de “Serras in atòngiu”, in Ros’e Mari Farm & Greenhouse, ddoe faghent sa mustra fotogràfica “Caras e Contos in Ros’’e Mari”, cuncordada dae s’assòtziu Dyaphrama.
In Crabas sighit sa rassigna literària atongina Istantanee d’autore, cuncordada dae sa Biblioteca comunale, paris cun s’Assessoradu de sa Cultura. Sàbadu a merie ddoe at a èssere Milena Agus chi, cun Sabrina Sanna, presentat su libru suo “Note de bentu chi passat”.
In fines, Ardaule acasàgiat sàbadu a mangianu s’addòbiu de Alfa Romeo e mototzicletas pro su de 2 Memorial in ammentu de Luigi Pinna.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
