Novas Aristanesas, giòbia 31 de mese de ledàmene de su 2024
Una coa de chida cun apuntamentos meda in provìntzia de Aristanis – Sunt unos cantos is apuntamentos chi in provìntzia de Aristanis s’ant a fàghere cumpangia in custa coa de chida. Cumentzamus dae sa die prus orrorosa de s’annu: Halloween. Custu merie in Aristanis torrant a fàghere sa de duas editziones de “Halloween in pratza”, in pratza de Tzitade, cun màscheras orrorosas, laboratòrios cun sa crocoriga e mùsica bella pro totus. Ddoe ant a èssere fintzas unas cantas paradas in ue s’at a pòdere papare. Sa faina dda cuncordat sa Pro Loco, a manos de pare cun s’Amministratzione comunale. In su Tzentru cummertziale “Porta Noa” protagonistas ant a èssere is Superanimadores cun is trucapipios, un’ispigru de sa timoria e Malèfica, sa mascotte mala.
Sàbadu a merie, imbetzes, in pratza de Porta Manna ddoe faghent “Notes grogas – Petza arrostida a cadriga”, un’apuntamentu cuncordadu dae Coldiretti de Aristanis e Campànnia Amiga, mentras in bia de Casteddu, in “La Terrazza”, ddoe at a àere un’addòbiu dedicadu a sa loba intra de petza biològica e binu Bovale Terraba DOC.
In prus, in su Museu Diotzesanu Arborensu sighint is apuntamentos cun sa de XV Rassignas de “Domìnigu in Cuntzertu”, cuncordados dae s’Ente pro is Cuntzertos de Aristanis: domìnigu a merie ddoe at a èssere sa violinista solista Elsa Grether chi at a sonare “Paganini – Su violinista diabòlicu”.
In Abas, sa Domo anca est nàschidu Antoni Gramsci chenàbura a merie at a acasagiare sa presentada de “Ìsula de gherra”, su libru-dossier fatu dae sa cambarada de traballu de s’assemblea A foras, a manos de pare cun Trinacria – Movimentu indipendentista sitzilianu e cun s’organizatzione cossa Core in fronte. S’apuntamentu est in sa sala de cursu de sa Sea, n. 14.
In fines, in Norghiddo, acostende a sa Die mundiale de su Diabete, su Comune, sa Asl de Aristanis e sa setzione sarda de s’Assòtziu Natzionale de is Atletas Diabèticos cuncordant unu domìnigu a mangianu in logu abertu, cun una passigiada peri is sartos de sa bidda de Guiltzier, unu pràngiu a cumone in su Tzentru de agregatzione sotziale e cun bìsitas mèigas gratis fatas dae is espertos de sa Asl de Aristanis.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
