In provìntzia unu muntone de bìnchidas in s’isport – Is isportivos e isportivas de s’Aristanesu ant otentu resurtados de importu in disciplinas diferentes. Una pariga de custos, a prus de èssere isportivos de talentu, sunt giòvanos puru: comente a Matteo Angius, chi tenet petzi otu annos, in su Campionadu italianu de moto piticheddas, at de pagu tempus conchistadu su sugundu postu, arribbende a petzi duos puntos dae su primu, furriende-sì a èssere, a manera ufitziale, su vitzecampione italianu de sa categoria Polini Junior A. Su pipiu pilota-mini at pigadu parte a su Campionadu italianu de velotzidade e faghet parte de sa camvarada Motorland Putumajore, chi est marcada in su motoclub Renzo Pasolini de Rìmini.
Su tzìrculu Veliamoci de Aristanis, in Casteddu, at pigadu su primu e su segundu postu in su dòpiu paralìmpicu Hansa 303, in ocasione de su Campionadu italianu classes olìmpicas – Edison Next 2024 Ant bintu Valentina Deiana e Francesca Ramazzotti, sighidas dae Lucia Garau e dae sa presidenta de Veliamoci, Maria Cristina Atzori. In s’iscaleri prus bàsciu de su pòdiu ddoe agatamus a Matteo Canova e a Chiara Ingaglio, de su Cìrcolo Nautico Nic de Catània.
Un’ispantu mannu pro su Campionadu italianu de ecuitatzione paralìmpica puru: medas e non pagas is medàllias chi is cadderis aristanesos ant conchistadu in su dressage, in sa gimkana e in su “sàrtiu a barrancos”, cadderis protagonistas in su de 15 Campionados italianos de ecuitatzione paralìmpica, in su tzentru ìpicu de Santu Chìrigu. A sa manifestada ddoe ant pigadu parte 59 atletas e 13 sotziedades arribbadas dae Sardigna, Badde de Aosta, Ligùria, Piemonte, Làtziu e Campània; sa manifestada dd’ant cuncordada in sa Giara Aristanesa, averiguada dae sa Fisdir, sa Federatzione italiana sport paralìmpicos de sos intelletivos – relatzionales, ma cun su patrotzìniu de su Comunu de Aristanis puru.
De non ismentigare is resurtados de importu de su 28 de cabudanne in Turre de su Putu, acanta de Cùglieri, pro su Campionadu italianu de tiru cun s’arcu 3D, cun sa premiatzione Under e Over 20 de is divisiones arcu nudu, arcu istintivu, longbow e compound. Sa manifestada cumentzada mèrculis 25 de su mese de cabudanni, dd’ant ordimingiada is Arcieri Uras impare a su Comitadu regionale Fitarco Sardigna, cun su patrotzìniu de sa Regione; in gara ddoe fiant unos bellos cantos de isportivos de sa provìntzia de Aristanis.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
