Unu sierotipu nou de limba biaita in provìntzia de Aristanis – Sighit a s’afortiare su pessamentu, in provìntzia de Aristanis, pro s’ispainamentu de sa Limba biaita. A is siendas interessadas dae custa pesta e a sos muntones de animales mortos, s’est agiunta una nova chi ponet pistighìngiu: sa positividade me in is allevamentos de prus comunos a su virus de sa Callentura catarrosa de is ovinos de sierotipu 8.
Iscobertu me in is provìntzias de Tàtari, Gaddura, Nùgoro, Ogiastra e Campidanu de Mesu, custu virus, nd’est essidu a pìgiu, in custas dies, cun su resurtadu de sas anàlisis.
Su 25 de su mese de cabudanni, sa Asl 5 de Aristanis aiat ghetadu sa grida: s’ùnicu sierotipu fiat su nùmeru 3, chi su Ministèriu de sa Salude non aiat ancoras nadu de “eja” pro fàghere mòvere su vatzinu.
Mancari esserent acabbadu sa vatzinatzione pro su sierotipu 8, custu s’est presentadu pro sa prima borta in sa provìntzia nostra.
Comente regordat su Servìtziu de Sanidade Animale de s’Asl 5, in intro de sas làcanas de sa provìntzia, francu is allevamentos anca ddoe est su virus o su reselu de sa presèntzia sua, su movimentu de is ovinos, caprinos e bovinos ddos ant a permìtere, bastit chi sos animales non tèngiant sos sìntomos de sa maladia sa die chi ddos ant a transire e s’ant a pòdere mòvere isceti a pustis de su cunsensu de s’Asl. Sunt imbetzes prus istrintas is normas chi pertocant su passare fache a unu logu anca non nche at positividade a sa maladia.
Segundu sos datos de s’Asl 5, chida passada su virus at fatu mòrrere prus de 800 berbeghes, lompende a 522 siendas. “S’ìndighe de sa mortalidade est crèschidu dae su 0.7 a su 0.85 pro chentu” at naradu Enrico Vacca, diretore de su Servìtziu de Sanidade animale de s’Asl 5, “un’ìndighe bassu cunforma a ocannu passadu, mancari sas siendas connoscant, in sa carrera econòmica, pèrdidas de importu. Chentinas e chentinas is istrumìngios e, a dolu mannu, regordamus chi su late de berbeghe s’otenet gràtzias a is angiadas”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
