Novas Aristanesas, mèrcuris 23 de mese de ledàmene de su 2024
Su Tzentru intermodale abarrat serradu – Semus oramai incarrerende cara a s’acabbu de su 2024 e paret chi, nimancu ocannu, su Tzentru intermodale de bia de Ilartzi abèrgiat. Pro nàrrere sa beridade, is cantzellos de s’istrutura nàschida a palas de s’istatzione de is trenos, acanta de su fàbricu betzu de sa tzeràmica Alquati, sunt abertos, ma pro immoe permitint isceti de tènnere un’àtera intrada a s’istatzione ferroviària e carchi parchègiu in prus. Is postales de s’Arst, is chi faghent servìtziu in totu sa provìntzia, non si bient e ancoras ant a istentare a si bìere. Mancat, difatis, su dinari pro acabbare sa viabilidade a inghìriu de su Tzentru intermodale e, prus che totu, sa tunda chi aiant cumentzadu a fraigare in bia de Marconi. Serbint, duncas, àteros finantziamentos. Sena de sa viabilidade noa is postales tenent ancoras dificultades pro lòmpere a su Tzentru chi, cando at a abèrrere, diat dèpere ismenguare su tràficu de mezos graes in tzitade e diat dèpere permìtere de impreare mègius su trasportu cun gomma e cun is trenos.
A parte custu, abarrant ancoras dudas meda in contu de su bisòngiu de custa istrutura noa, chi transit a is oros de sa tzitade s’istatzione de is postales chi fintzas a oe fiat acasagiada in su tzentru de Aristanis, in s’autoistatzione de s’Arst, dae ue faghet a lòmpere a pee in pagos minutos a is ufìtzios e a is servìtzios pùblicos prus de importu. Cun su Tzentru intermodale nou is tzitadinos chi biàgiant nd’ant a dèpere calare dae su trenu o dae su postale e ant a dèpere pigare su de sa retza urbana, cunsiderende fintzas is tempos de percurrèntzia. No at a èssere discansosu a mudare is costumàntzias de is biagiadores, ne est seguru chi sa tzitade de Lionora, in fines, nde potzat tènnere profetu a beru dae s’abertura de su Tzentru intermodale.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
