spot_img
giovedì, Gennaio 23, 2025

Novas Aristanesas, chenàbura 29 de onniasantu de su 2024

Afortiamentu de sos servìtzios pro sos tzitadinos – Traballu de importu pro ammodernare sos servìtzios pùblicos in provìntzia de Aristanis, cun s’annoamentu pagu tempus a como de sos ufìtzios de sa Coldiretti e de sas Postas Italianas, logos de riferimentu de importu mannu pro sa comunidade locale.

Est agabbada sa ristruturatzione de s’ufìtziu de zona de sa Coldiretti de Terraba, in ue como su logu est modernu e praghile, a sa matessi manera de su progetu de sos ufìtzios de sa Confederatzione de sos coltivadores diretos in totu sa Sardigna. In prus de sa ristruturatzione de sos ambientes, ant afortiadu su personale puru, agiunghende unu funtzionàriu nou, pro rispòndere a sos bisòngios semper creschendede de consulèntzias, e non pro sos massajos ebbia ma fintzas pro totu sos tzitadinos de su giassu de Terraba. Terraba est una de sas sete seas de sa Federatzione provintziale de Aristanis paris cun Abas, Arborea, Crabas, Cùglieri, Ilartzi e Aristanis. Custu est su de bator ufìtzios torradu a fàghere a nou dae su 2018, a pustis de sos de Ilartzi, Arborea, Crabas e Aristanis.

Un’àteru passu de importu pro s’afortiamentu de sos servìtzios dd’at fatu s’ufìtziu de sas Postas de Crabas, chi at torradu a abèrrere a pustis de traballos de ristruturatzione acapiados a su progetu Polis. Su traballu fatu at megioradu su logu, cun isportellos prus pagu artos, postatziones ergonòmicas e unu percursu dedicadu a sos tzurpos. In prus in s’ufìtziu ddoe ant postu telecàmeras e unu sistema de seguresa modernu meda, pro amparare a sos tzitadinos e a su personale. Su progetu Polis de sas Postas Italianas, chi punnat a promòvere s’unione econòmica e sotziale in sas biddigheddas piticas, dat sa possibilidade de pedire in s’isportellu tzertificados de s’INPS comente de su tzedolinu de sa pensione e sa tzertificatzione ùnica.

Custos traballos mustrant s’impignu de Coldiretti e de sas Postas Italianas  pro megiorare de sighiu sos servìtzios pro sos tzitadinos de sa provìntzia de Aristanis, agiudende a fàghere diventare su territòriu prus ospitale e prus biu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.

Red
Red

LASCIA UN COMMENTO

Inserisci il tuo commento!
Inserisci qui il tuo nome

For security, use of Google's reCAPTCHA service is required which is subject to the Google Privacy Policy and Terms of Use.

ULTIME NOTIZIE

Novas Aristanesas, martis 31 de nadale de su 2024

Festas e dies de ponte in su 2025  – In su 2025 isceti sa festa de Totu is Santos at a resurtare in sàbadu e sa de su Regordu de is Mortos in domìnigu. Is àteras festas ant a acontèssere, imbetzes, a intro de chida, donende bortas meda s’ocasione pro si pasare e pro allonghiare is fèrias.

S’annu at a cumentzare cun sa Prima die, chi at a resurtare in mèrcuris, sighidu dae sa Festa de is Tres Rees, chi at a èssere in lunis. Su 25 de abrile at a èssere in chenàbura, mentras su 1 de maju in giòbia. In làmpadas, sa Festa de sa Repùblica at a acontèssere unu lunis, mentras sa Festa de Mesaustu at a resurtare in chenàbura. Totu is Santos, comente amus naradu, at a resurtare in sàbadu, mentras Sa Purìssima at a èssere in lunis. Paschighedda de su 2025 at a èssere in giòbia, mentras sa die in fatu, Santu Istèvene, at a èssere in chenàbura.

Connoschende is datas, faghet a si programmare carchi die de “ponte”. Su primu ponte diat pòdere èssere giai a primìtzios de annu, pro sa Festa de is Tres Rees (su 6 de ghennàrgiu), chi est unu lunis, allonghiende sa coa de chida fintzas a martis 7 de ghennàrgiu. Un’àtera ocasione bona si presentat in beranu, gràtzias a sa cumbinatzione intra de sa Festa de sa Liberatzione (su 25 de abrile, una chenàbura) e sa Festa de is Traballadores (sa prima die de maju, chi est una giòbia). Cun a penas bator dies de fèrias (dae su 28 de abrile a su 2 de maju), si diat pòdere gosare de sa bellesa de deghe dies de vacàntzia, dae su 25 de abrile a su 4 de maju. 

In làmpadas, sa Festa de sa Repùblica (2 de làmpadas, unu lunis) oferit un’àteru ponte de tres dies, bellu pro si pasare in antis de is vacàntzias de s’istadiale. Mesaustu (su 15 de austu, in chenàbura) at a assegurare una coa de chida de tres dies, bella pro chie podet andare a mare o a monte.

S’8 de nadale puru, die de Sa Purìssima, est unu lunis, allonghiende sa coa de chida in antis.

Is festas de Paschighedda, chi in su 2025 at a acontèssere una giòbia, ant a permìtere de si pasare fintzas a domìnigu 28 de nadale. Ma, pighende carchi die de fèrias, si podet perlongare sa vacàntzia fintzas a s’Annu Nou, isfrutende totu is festas. 

Cun custas datas, duncas, su 2025 chi amegat de intrare oferit unas cantas possibilidades pro si programmare carchi vacàntzia in prus e, comente si siat, pro si pasare.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.

Tutte le notizie

OristanoNoi: gli eventi, le storie, i volti di Oristano. Noi | OristanoNoi - Iscrizione al Registro della Stampa del Tribunale di Oristano numero 2577 del 27.12.2019 - Direttore responsabile Marco Enna - Edito da Radio Cuore di Giovanna Maria Fenu & C. sas – Oristano – Partita Iva 00619690951 - Hosting provider Aruba Spa, Via San Clemente, 53 – Ponte San Pietro – 24036 (BG) – P.I. 01573850516

Contattaci: posta@oristanonoi.it

© Newspaper Theme | All rights reserved