Novas Aristanesas, giòbia 21 de onniasantu de su 2024
Birde urbanu pro imbonire e inclùdere – Su birde urbanu s’est furriende a èssere de importu mannu in is tzitades, no isceti pro su valore estèticu, ma fintzas pro su profetu sotziale chi isbòligat. Fainas de custos ùrtimos tempos ant mustradu chi sa cualificatzione noa de is logos birdes agiudat a megiorare s’ambiente urbanu e, in su pròpiu tempus, a afortiare sa coesione sotziale.
Un’esempru est s’interventu de su Tzentru de salude mentale de su Distretu de Abas-Terraba, chi gràtzias a s’agiudu de persones cun istorbos psìchicos at assentadu unu logu pùblicu in Terraba. A manos de pare cun su Comune e cun s’Agentzia Forestas, malàidos e operadores de su CSM ant torradu a abbiatzare is tuligheddas de sa palestra de bia de De Amicis, prantende 280 molas de matedu mediterràneu. Custu interventu est serbidu no isceti pro megiorare cussu logu pro totu sa tzitadinàntzia, ma fintzas pro mustrare chi is persones cun problemas de salude mentale podent ghetare una manu de agiudu a sa comunidade. Unu mosàicu fatu dae unu de is pitzocheddos de su CSM, chi dd’ant a cuncordare in cussu logu, est un’àteru sinnale craru de custa “nàschida noa”.
In Marrùbiu puru, in ocasione de sa Die natzionale de is matas, is istudiantes de is iscolas mèdias ponent 50 matas de opinu de mare e de èlighe, sinnu de sa sensibilidade de is generatziones noas cara a su respetu de s’ambiente. Custa faina, a prus de afortiare sa cuscièntzia ecològica, est unu momentu de educatzione de importu, gràtzias fintzas a s’agiudu de su Corpus Forestale.
In fines, in Aristanis, una pariga intra de is pratzas prus connotas de sa tzitade – pratza de Manno e pratza de Marianu – ddas sunt torrende a fàghere a nou, cun tuligheddas de erba e matas noas. Custu at a permìtere de dare una vida noa a custos logos de addòbiu, megiorende sa calidade de sa vida de is tzitadinos. Su birde urbanu, duncas, no est isceti un’imbonimentu pro is ogros, ma est fintzas un’aina de inclusione, de educatzione e de abbiatzamentu in sa carrera sotziale.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
