Provìntzia, su traballu de s’amministradore nou – Bilàntziu de su primu mese de faina pro s’amministradore istraordinàriu nou de sa provìntzia de Aristanis, Battista Ghisu, chi amegat de chircare una solutzione de unas cantas chistiones malas a isboligare: intra de custas, is cunditziones de is bias provintziales e sa crisi de su setore de sa pisca in provìntzia de Aristanis.
Comente at naradu Ghisu etotu in ocasione de s’acasagiamentu suo in Provìntzia, sa seguresa de sa retza de is bias provintziales est una de is cosas prus de importu pro s’Ente. Est pro cussu chi ant giai programmadu e incarreradu is primos interventos.
In is dies passadas ant abertu su cantieri in sa Bia provintziale n. 33: ant a torrare a fàghere su pìgiu de sa bia in su tretu intra de su rugheri de Arruinas e sa bidda de Samugheo e ant a torrare a fàghere a nou fintzas sa signalètica. Àteros interventos si prevident semper in sa B.P. 33, dae s’essida de Fordongianus, cara a Àllai e Samugheo, fintzas a sa làcana cun sa provìntzia de Nùgoro, cara a Atzara. Ant a pònnere in seguresa, duncas, custa bia de importu chi aunit a pare su Mandrolisai cun sa provìntzia de Aristanis.
Intra de is àteros interventos si previdet fintzas su fràigu de una tunda in su portu industriale de Aristanis-Santa Justa, sa cunsigna de is òperas in sa Bia provintziale n. 9 e s’incarreru de is traballos in sa Bia provintziale n. 15.
Àtera chistione betza e chi est in s’agenda de sa Provìntzia est sa de sa presèntzia de su corbu ambiddàrgiu in is istànios e is traballos de acontzu idràulicu de custos. Nd’ant faeddadu martis passadu in Provìntzia cun is presidentes de is Cunsòrtzios pro sa pisca e cun is rapresentantes de is organizatziones de categoria: nd’est essidu a pìgiu chi is contributos no bastant e chi tocat a mudare sa norma chi ddos previdet, a prus de fàghere unu tzensimentu giustu de su nùmeru de corbos ambiddàrgios presentes me in is istànios de sa provìntzia de Aristanis.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
