S’atòngiu est arribadu: comente pòdere fàghere pro si defensare dae s’influèntzia – Cun s’arribu de s’atòngiu, torrant is primos resfrios e torrat fintzas s’influèntzia. Est pretzisu, duncas, a si-nde regordare de carchi consìgiu e de carchi costumàntzia bella pro fàghere preventzione.
Un’esempru, est mègius a si sabunare fatu-fatu is manos e a si-ddas istèrgere bene; a ammantare su nasu e sa buca cando s’istùrridat o si tussit cun mucadoreddos imprea e fùlia, o a si-nde abarrare in domo in is primas dies cando essit s’influèntzia e a evitare de s’acostire tropu a persones malàidas.
Comente si siat, sa vatzinatzione est sa manera prus atziva e segura pro prevènnere s’influèntzia e pro nde ismenguare is cumplicàntzias. In custas dies su Dipartimentu de Igiene e Preventzione sanitària at incarreradu sa campànnia de vatzinatzione antinfluentziale in su territòriu de cumpetèntzia de sa Asl 5 de Aristanis, cun 28.000 doses disponìbiles chi s’ant a pòdere agatare in is tzentros pro is vatzinos e in is ambulatòrios de is mèigos de famìllia.
Is vatzinatziones ddas ant giai incarreradas in is domos de pausu e in is residèntzias assistentziales de sa provìntzia, mentras – cumentzende dae s’11 de onniasantu – sunt a disponimentu fintzas de chie nde faghet domanda, cun un’atentu particulare cun pro is categorias prus in arriscu, chi diat èssere mègius a fàghere su vatzinu e ddu podent otènnere gratis.
Is categorias in arriscu sunt custas: totu is chi tenent prus de 60 annos; is chi tenent problemas immunològicos; is malàidos chi sufrint de patologias crònicas degeneradoras; is familiares de sugetos dìligos e is chi ddos atendent; is pipios intra de ses meses e ses annos; is fèminas prìngias; is operadores sanitàrios; is persones chi si-nde incurant de servìtzios pùblicos de interessu a cumone (personale de is òrganos de politzia e impiegados pùblicos chi faghent isportellu; is donadores de sàmbene.
Faghet a si prenotare luegos me in is tzentros pro is vatzinos de sa provìntzia. In prus, at a fàghere a retzire su vatzinu antinfluentziale paris cun cussu contras de sa Covid-19, o paris cun cussu anti-pneumococo o Herpes zoster, segundu is inditos frunidos dae su personale sanitàriu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
