Novas Aristanesas, chenàbura 13 de nadale de su 2024
Inclusione sotziale in Aristanis – Sa comunidade “Il Gabbiano” e sa cooperativa “Sea Scout” sunt duas realidades de Aristanis chi dae tempus meda oramai dant agiudu e oportunidades a persones cun disabilidades. Cun progetos diferentes, ambas duas mustrant chi s’inclusione no est una tarea ebbia, ma unu caminu chi irrichit totu sa comunidade.
Mescamente a fine de chida, sas duas realidades de Aristanis sunt istadas impignadas in duas ocasiones de importu: sa prima, sa cooperativa Sea Scout, cun sa serrada iscènica finale de sa cumpangia TeAltro, mentres sa segunda, “Il Gabbiano”, at afestadu sos baranta annos de atividade.
Su progetu TeAltro est nàschidu comente a laboratòriu pro persones cun dificultade de cumprèndere e de istare paris cun sos àteros e chi s’est mudada in una cumpangia teatrale. Sàbadu 7 de nadale su grupu s’est esibidu in sa de tres òperas suas, intitulada Un Natale sotto inchiesta, in su teatru de carrera Pergolesi in Aristanis. Ghiadu dae Sara Dessena, su progetu est fatu dae trèighi atores chi, paris cun sos partetzipantes a sos laboratòrios criadores, si òcupant fintzas de iscenegiaduras, costùmenes e iscenografias. Unu caminu chi si isperat de pòdere portare fintzas a foras de sa cooperativa.
In su matessi tempus, domìnigu 8 de nadale, sa comunidade Il Gabbiano at festadu sos 40 annos de atividade, in sa parròchia de Santu Giuanne Evangelista: a prus de sa missa, ispetàculos meda fatos dae sos pitzocos de sa comunidade. Est una cosa de importu mannu pro un’istitutzione chi dae su 1984 est unu puntu de riferimentu pro persones cun disabilidades e sas famìllias issoro. Fundada dae sos padres de sa Cungregatzione de sos Fìgios de s’Immaculada Cuntzetzione, “Il Gabbiano” at semper promòvidu progetos noos: dae sos laboratòrios de aviamentu a su traballu, a sa musicoterapia, finas a s’ùltimu progetu, La Casa di Ivan, un’istrutura residentziale pensada pro su “a pustis de nois”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
