Novas Aristanesas, martis 10 de nadale de su 2024
Nadale e Solidariedade –In provìntzia de Aristanis, sas festas de Nadale sunt un’ocasione ispetziale pro espressare solidariedade e agiudu a chie est in dificultade. In Crabas, s’Assessoradu pro sas Polìticas sotziales at cuncordadu sa de sete editziones de “Una Paschighedda pro totus!”, un’apuntamentu pro regòllere dinari e benes de prima netzessidade pro sas famìllias chi nde tenent bisòngiu. Dae s’11 a su 20 de nadale, s’at a pòdere donare cosa de mandigare e benes essentziales in sas butegas mannas e piticas de sa bidda. Sas imboligadas-donu s’ant a dare su 23 de nadale, gràtzias a s’impignu de sos assòtzios locales Anteas Cabras e Vincenziane Sacro Cuore Cabras, chi traballant paris cun sa parròchia e su Servìtziu sotziale comunale.
Semper in Crabas, b’at un’àtera initziativa de solidariedade proposta dae s’assòtziu de Is Curridoris de Santu Sarbadore. S’assòtziu at regortu giogos, panetones, ispumantes e àteras cosas de Nadale, chi ant a èssere distribuidas dae sos assòtzios locales.
Un’àtera proposta de importu benit dae su Museu Diotzesanu Arborensu, chi at ammaniadu “Su bratzolu de su Naschimentu” in su giardinu de su museu. Finas a s’8 de ghennàrgiu, onniunu podet lassare o si nde podet leare, sena pagare nudda, cosas de onni genia. Custa faina de solidariedade punnat a fàghere nàschere unu tzìrculu virtuosu de cuncàmbia, cun sa tarea de dare unu pagu de gosu a chie nde tenet bisòngiu. Sos ogetos chi b’ant a abarrare s’ant a dare a sa Caritas diotzesana.
Non mancant mancu sas initziativas traditzionales de Nadale, comente a sos panetones solidales. Cun una donatzione de a su mancus 10 èuros, si podent agiudare sas fainas de sa Rughe Ruja, dae s’assistèntzia mèdica a s’isparghidura de cosa de mandigare. Sos panetones solidales bi sunt giai in Aristanis e in àteros comunes de sa provìntzia.
Ant fatu fintzas sa chena solidale promòvida dae L’Orto di Eleonora, in ue ant regortu giai 30.000 èuros, pro sustènnere progetos de isvilupu in Burundi.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
