S’isport protagonista in sas biddas acanta de Aristanis – Creschet s’atentu de sos comunes de sos chìrrios de Aristanis pro sas fainas isportivas: dae sas istruturas noas, finas a sos momentos dedicados a disciplinas meda, sa gente podet gosare de una filera longa de addòbios.
Movende dae Arborea, in ue a s’acabbu de santugaine ant abertu sa palestra in foras “Sport di tutti – Parchi”, unu progetu a incuru de Sport e Salute S.p.A, s’assòtziu de s’Istadu pro promòvere s’isport e sos istiles de vida sanos, promòvidu paris cun s’Assòtziu natzionale Comunes Italianos.
S’impiantu nou acanta de sa pratza Giovanni Paolo II est collegadu a sa retza de sas àteras istruturas giai collocadas in su restu de Itàlia: sa particularidade est chi in ogni atretzu b’at unu QR code, dae in ue sos tzitadinos podent iscarrigare esertzìtzios chi serbint pro sos allenamentos.
Su progetu de Isport e Salude s’est fatu fintzas in su Comune de Santa Justa, chi in sas dies passadas at inauguradu sa palestra in foras de su parcu de carrera Toscanini cun sa costumàntzia de segare su nastru. Inoghe puru b’est su QR code, s’at a dare in gestione a sa Asd Polisportiva Aeden Santa Justa.
Paulle si preparat imbetzes a duas dies de isport mannu tituladas “Sa passione chi aunit”. Sa prima at a èssere su 7 de nadale, in su teatru Grazia Deledda, cun sa cunferèntzia “Sos valores de s’isport”: ant a faeddare Andrea Lucchetta, Manuela Olivieri, mugere de Pietro Mennea; Tommaso Giulini, presidente de su Casteddu Càlcio; Stefano Sardara, presidente de sa Dìnamo Sassari Basket; Eliseo Secci, presidente de sa Federatzione Italiana Pallavolo sarda; e Mauro Riva, fìgiu de su campione Gigi Riva. Su 14 b’est su Cross internatzionale de atlètica lèbia in su parcu archeològicu de Santa Cristina. B’ant a èssere s’assessore regionale de s’Isport Franco Cuccureddu e Nicola Riva.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
