Is festas intra de Covid-19 e influèntzia – Non sunt istados pagos is aristanesos chi ddis est tocadu a renuntziare a sa chena de su 31 de nadale cun amigos e parentes e a is cuntzertos in pratza: a dolu mannu in medas nche dd’ant passada in domo, corcados in su callente, pro more de s’influèntzia o de sa Covid-19 chi, comente at infriscadu su tempus, amegat de si torrare a ispàrghere.
Intra de resfriu, dolore de gùturu, istrachìmine, tùssiu e – a bortas – callentura arta, medas ant fatu provista de meighinas antipirèticas e antinfluentziales, pro chircare de parare fronte a custas maladias infadosas.
Ma is potecarias ant bèndidu fintzas àteros produsimentos. “Dae su cumentzu de su mese de nadale, est crèschida meda sa bèndida de is tampones de fàghere in domo”, at naradu Pierluigi Annis, presidente de Federfarma Sardigna e de Federfarma Aristanis, “ma est crèschidu fintzas su nùmeru de is tampones fatos in potecaria etotu, cussos cun sa tzertificatzione. Non semus però a livellu de cuddos chi faghiamus in is annos passados: in antis, onni die nde faghiamus a deghinas de test, oe chimbe o ses ònnia die”.
E, mancari su de fàghere su tampone resurtet sa manera prus segura pro seberare si sa maladia est Covid-19 o influèntzia, si podent osservare fintzas is diferèntzias in is sinnales chi dant. “Sa callentura est prus fitiana cun s’influèntzia, cun tùssiu, dolore de gùturu e gana mala”, narat Gianfranca Atsoggiu, mèigu de base in Aristanis. “Sa Covid-19 ingendrat de prus rinites, laringites e tùssiu, acumpangiadas dae dolore de conca”.
Calicunu ispediente agiudat a nche passare is primas dies de s’annu nou chirchende de non nde buscare su virus: est profetosu a si sabunare a fitianu is manos, sena de si tocare su nasu, sa buca o is ogros in antis de si ddas sabunare, est pretzisu a si-nde abarrare a tretu dae chie est malàidu e a si pònnere sa mascheredda cando andamus a logos in ue ddoe diat pòdere àere gente malàdia.
Un’àtera aina est su vatzinu: siat cussu contras de s’influèntzia, siat cussu anti-Covid-19. Faghet a ddu fàghere sena de si prenotare, dae su lunis a sa chenàbura, intra de is noe oras de mangianu e mesudie (su martis e sa giòbia a merie puru, dae is tres a is chimbe), in s’ambulatòriu de bia de Carducci n. 35, in Aristanis, o me in is àteros ambulatòrios de sa provìntzia in ue faghent is vatzinos.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
