Traballos in cursu de faghimentu in Aristanis – Sunt medas is cantieris e is traballos in cursu de faghimentu in sa tzitade de Aristanis: intra de barrancos, firmadas de is cantieris e traballos chi andant a bellu a bellu, is tzitadinos amegant de bìere comente totu andant a in antis.
Unu de is fràigos istòricos interessados dae traballos de acontzu est su Teatru Garau, chi in custos meses acasàgiat is ispetàculos de sa stajone de prosa de su Cedac. Agiudicados in is meses passados pro unu tanti de unos 364.000 èuros, pro custos traballos su Comune tenet a disponimentu 500.000 èuros gràtzias a unos cantos contributos ministeriales e àteros 100.000 èuros gràtzias a su PNRR.
E mancari su progetu non mudet in sa carrera architetònica, at a permìtere de torrare a abèrrere sa galleria e, a intro de su mese de martzu, su Comune at a aprovare una perìtzia de mudadura in cursu de faghimentu pro more ca ddoe ant agatadu unas cantas màchinas tèrmicas e pro permìtere de torrare a alliniare s’istratigrafia de sa bòveda.
Su chi abarrat serradu pro traballos, imbetzes, est s’Hospitalis Sancti Antoni: faghet parte de su fàbbricu de s’asilu betzu e ddoe sunt faghende traballos partzidos in duos lotos. Pro su primu, chi previdet s’adeguamentu a is normas contras de su fogu, s’ispesa est de 200 mìgia èuros; pro s’àteru, chi pertocat traballos de acontzu de su fàbbricu, s’ispesa est de 300.000 èuros. Is traballos, chi depiant comintzare giai in su mese de santandria de su 2023, ant a interessare a pustis sa Biblioteca comunale, acasagiada in su matessi fràigu.
Unu cantieri chi in custos meses est ingendrende s’abetu mannu de is tzitadinos est cussu de pratza de Manno, in ue is traballos sunt torrados a comintzare dae una pariga de dies, a pustis chi sa Giunta comunale aiat aprovadu sa de duas mudaduras de su progetu, cun s’aprovu de sa Subrintendèntzia.
Sa punna, immoe, est sa de avalorare su pamentu a iscachiera agatadu in su faghimentu de is traballos, chi faghiat parte de sa crèsia betza de Santu Giuanne Evangelista, su putzu antigu e su chi abarrat de sa Port’’e Mari betza.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
