Su Giubileu in provìntzia de Aristanis – Pro sa comunidade catòlica su 2025 est un’annu de importu: difatis, est s’annu de su Giubileu, una simana de meledu e de acostamentu de is fideles a Deus.
E, si in Roma paba Frantziscu at incarreradu custu apuntamentu cun s’abertura de sa Ghenna Santa su 24 de su mese de nadale, is fideles puru de is tres diòtzesis de sa provìntzia de Aristanis si sunt aunidos in pregadoria pro custa ocasione.
In Aristanis, su pìscamu de s’Artzidiòtzesi de Aristanis e de sa Diòtzesi de Abas e Terraba, Roberto Carboni, at incarreradu s’annu giubilare cun una prufessone chi dae sa crèsia de Santu Frantziscu est lòmpida a sa Sea de Santa Maria, a ue is fideles sunt intrados passende peri sa ghenna manna, faghende a manera simbòlica su chi at fatu su paba in Roma.
Munsennore Carboni est andadu a Abas puru: in Marmidda Arta ant lèghidu is tretos prus de importu de sa Bulla de incarreru de s’annu giubilare e unos cantos tretos de su Vangèliu. A pustis de sa prufessone e de unu momentu de pregadoria in dae in antis de sa rughe chi nd’ant pesadu in sa pratza de sa Sea, munsennore at fatu sa missa, a ue ddoe ant pigadu parte fideles meda.
Pro s’Artzidiòtzesi at a èssere un’annu de comunione e de ispera. “Sa Bulla de incarreru nos acumpàngiat cun sabidoria a su coro de sa tzelebratzione solenne chi amegamus de bìvere custu merie e chi aberit su tempus de su Giubileu fintzas in is crèsias nostras de Aristanis e de Abas-Terraba. Is faeddos iscritos dae su paba nos agiudant a cumprèndere mègius ite est su Giubileu, ma nos inditant fintzas is passos chi bolent fatos pro ddu bìvere in fungudesa”, at naradu su pìscamu Carboni in sa prèiga chi at fatu in Aristanis. “Deus, chi biet a intro de su coro de onniunu de nois, nos acumpàngiat e non nos lassat mai solos. Pro chi su tempus de su Giubileu siat a berus unu tempus de annoadura ispirituale, de misericòrdia e de caridade”, at atzuntu munsennore Carboni.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
