Paritzos addòbios in custa coa de chida in provìntzia – Un’àtera coa de chida rica de addòbios de non pèrdere in sas biddas acanta de Aristanis. In Sabarussa sàbadu a sero comintzat “Abetende Paschighedda” cun s’aperitivu musicale paris cun su grupu “TriumViratum” in sa cortilla de sa Domo de sos Naitana. S’incràs, pro sa Purìssima, imbetzes, in sa Pratza de is Ballus arribat su Nadale in pratza cun sos mercadeddos e su presèpiu.
Fintzas in Terraba si respirat s’ària de Nadale cun sa de 10 editziones de “Is bias de Paschighedda”: domìnigu in pratza arribant sos mercadeddos, ma b’at a àere fintzas cosa de mandigare, ballos e teatru.
In Aristanis, imbetzes, b’est su cuntzertu “Vita, dulcedo et spes” pro s’apuntamentu nou de s’Ente pro sos Cuntzertos “Alba Pani Passino”. Domìnigu a sero, in su palcu de sa crèsia de su Cramu, ant a cantare su sopranu Valentina Satta e su contratenore Ettore Àgati, cun s’acumpangiamentu de s’organista Fabio Frigato. Sa die in antis ancora mùsica cun s’esòrdiu de su Story Fèstival e su primu addòbiu esclusivu in su Lux Club cun tres istràngios de livellu natzionale: Fred De Palma, Damianito e Manuelito e chimbe dj locales.
In Donigala, imbetzes, domìnigu torrat sa segunda editzione de su mercadeddu de Nadale de su Comitadu de Sant’Antoninu 2025, in pratza de crèsia.
In su Sinis, imbetzes, sa die de sa Purìssima b’est sa tapa italiana de sa Uci Cyclo-Cross World Cup 2024-2025. Domìnigu a mangianu in Is Arutas, in su territòriu de Crabas, sa partèntzia pro sas categorias Fèminas Élitealle est a sas 13.40, mentras cussa de sos Òmines Élite est a sas 15.10.
Sighit fintzas sa rassigna “Arruinas … una bidda chi cheret bìvida”: sàbadu in programma sa die de sos betzos cun un’ispetàculu in pratza. Domìnigu apuntamentu cun su campionadu de budokan, una mustra artìstica e su cuntzertu “Biàgiu in sa mùsica de autore”.
Sèneghe, in fines, ammentat a unu de sos mannos de su cantu a tenore: sàbadu a sero b’at a èssere su primu Memòrial dedicadu a Boricheddu Trogu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
