In provìntzia de Aristanis oportunidades meda de traballu – Sa provìntzia de Aristanis est aprontende-si a un’istajone de oportunidades de traballu noas gràtzias a bandos importantes publicados in sos setores de sa sanidade e de s’ambiente.
Pro esempru, su 3 de nadale ant publicadu un’avisu pùblicu chi dat campu a cantieris de traballu isperimentales, chi punnant a nche fàghere intrare operadores sòtziu-sanitàrios (OSS) cualificados, dende un’oportunidade de traballu importante a disocupados e disocupadas chi tèngiant cualìfica professionale in su setore sanitàriu. Prus in craru, in s’Asl de Aristanis b’at 26 postos chi prevident de leare a tempus determinadu, pro 8 meses, personale de fàghere traballare in sas Aziendas de su Servìtziu sanitàriu regionale, in istruturas diferentes, cun cuntratu colletivu natzionale de traballu in su setore pùblicu.
Semper s’Asl de Aristanis devet assignare 14 incàrrigos de ispetzialìstica de ambulatòriu, a tempus indeterminadu, pro 121,5 oras a sa chida in totu. Si podet mandare domanda in lìnia, intro de domìnigu 15 de nadale, esaminende su bandu in s’albu pretòriu de Ares, in sa setzione Bandos e avisos de meighina cunventzionada.
In ùrtimu, a pustis de àere isetadu annos, sunt publicados sos bandos pro su reclutamentu in s’Agentzia Forestas, s’ente regionale chi tenet s’incàrrigu de amministrare e valorizare su patrimòniu forestale. Sos bandos, chi s’agatant in su situ de Aspal, prevident de dare traballu a tempus indeterminadu, aplichende su cuntratu colletivu de traballu de sa Regione Sardigna. Sunt paritzas sas cualìficas e sas figuras chi serbint, cun tantos postos chi sunt vinculados a sa residèntzia in localidades diversas de sa provìntzia de Aristanis. Intre sas figuras netzessàrias bi nd’at collegadas a su contivìgiu e mantenimentu de su patrimòniu forestale, ma serbit finas gente chi siat bona a portare machinàrios graes e a fàghere traballos de sartu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
