S’Iscola de su Pòpulu in Aristanis e Uras – Nàschida in su 2019, s’Iscola de su Pòpulu de Aristanis oramai est presa a filu dòpiu cun sa tzitade e cun Uras, semper pronta a cuncordare fainas paris cun s’Auser e su Comune.
Pròpiu in custas dies, sa realidade firmada Cgil afestat su de chimbe annos de atividade in su cabu-logu cun su comintzu de sas iscritziones a sos cursos sena pagare nudda, chi ant a èssere de inglesu, tedescu, de archeologia, de cultura e istòria sarda, e finas de giardinàgiu, tècnica de comunicatzione e educatzione tzìvica.
Sas letziones las ant a propònnere comente addòbios, comente interatzione sotziale, favoressende unu cunfrontu utilosu cun sos partetzipantes.
Una punna sighida fintzas in Uras, cun una nova pro sa comunidade de sa bidda de su Campidanu de Terraba: sa Domo de sas Fèminas. Acasagiadu dae sa Fundatzione Berlinguer, su logu s’at a nàrrere “Su furrungone de sas tzarras”, su matessi nùmene de s’initziativa proposta dae s’Iscola de su Pòpulu de Roma.
“Su progetu tenet sa punna de pònnere a disponimentu unu logu in ue sas fèminas si potzant atobiare pro progetare e propònnere a totu sa comunidade su contributu issoro de ideas “pensadas dae sas fèminas e pro sas fèminas”, at cummentadu Ivo Vacca, de s’Iscola de su Pòpulu. “In custu logu in ue no ant a mancare momentos de creatividade artìstica e literària, s’at a propònnere sa nàschida de unu logu de ascurtu e de agiudu pro sas fèminas chi sunt in dificultade, cun s’agiudu de assòtzios ispetzializados in custu campu”.
Unu raportu, cussu de s’Iscola de su Pòpulu cun Uras, semper prus istrintu, fintzas in su momentu de su bisòngiu: in ocasione de s’undamentu de carchi chida a como, sa realidade aristanesa s’est posta a disponimentu luego pro agiuare sa comunidade de Uras, degolliada dae sos undamentos, cun ispìritu mannu de bonucoro.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
