Bandos pro is impresas de Guiltzier e Barigadu – Pro megiorare semper de prus s’oferta turìstica e cun s’idea de incarrerare progetos noos in su tempus benidore, su Gal Barigadu Guiltzier at postu unu millione e mesu de èuros pro 27 impresas de su territòriu, gràtzias a duos bandos.
Prus a fine, cun su primu progetu “Bivi Bargui. Intra de ecoturismu e annoadura: afortiamentu e diversificatzione de is impresas extra-agrìculas comente a aina pro una cumpetitividade noa”, lòmpidu a sa de duas editziones, ant finantziadu noe siendas extra-agrìculas, chi traballant in su setore turìsticu in su territòriu de is Uniones de Comunes de Barigadu e de Guiltzier. Ant otentu, in totu, unos 600.000 èuros, cun un’investimentu reale de 800.000 èuros intra de servìtzios e atretzaduras.
Su territòriu at mustradu gana de crèschere e de si fàghere a connòschere, semper cun sa punna de ismanniare s’oferta turìstica e is servìtzios, cunsideradu fintzas s’àteru bandu, “Isvilupu de fainas imprenditoriales noas in is produsimentos extra-agrìculos”, dedicadu a is siendas noas cun ideas annoadoras.
Sunt 18 is siendas chi ant a nàschere me in is territòrios de Barigadu e de Guiltzier cun un’investimentu dae parte de su Gal de 900.000 èuros.
“Cun custos bandos de su Gal Barigadu Guiltzier”, at decraradu su presidente de su Gal Pietro Arca, “amus chèrfidu incoragire siat is siendas chi giai s’agatant, siat cussas chi gràtzias a su Gal ant a pòdere nàschere, in unu territòriu ricu de arranguitzos naturales, archeològicos e culturales cun potentzialidades turìsticas mannas a beru. Una inietzione de fidùtzia de importu mannu, chi – nde semus seguros – si-nd’at a bìere su profetu in tretu de pagos annos”.
A intro de su 30 de làmpadas de su 2025 ant a acabbare is progetos finantziados cun sa programmatzione betza e ant a incarrerare is bandos de finantziamentu noos, ligados a sa programmatzione noa.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
