Addòbios e fainas pro firmare sa violèntzia contras de is fèminas – Sa Die pro chi acabbet sa violèntzia contras de is fèminas in provìntzia de Aristanis, unu muntone de comunidades de sa Provìntzia de Aristanis puru ant ordimingiadu addòbios pro responsabilizare sa populatzione. In Paulle, su Comunu e sa Consulta de is Giòvanos ant cuncordadu duos addòbios “Non una de mancu”, chi s’ant a fàghere oe e su 29 de su mese de santandria. In sa die de oe (a is ses de merie, in su fàbbricu de sa Consulta) de su tema “Controllu malu de s’emotzione” nd’at a allegare sa neuropsichiatra infantile Franca Carboni, sighida de sa proietzione de su cortzumetràgiu “Dalia” (2023). Su film contat sa vida de una pipia vìtima de violèntzia e nos fàghere pònnere camba a unu meledu de importu: unu meledu in contu de su male chi podet èssere acanta de nois, ma chi non renessimus a bìdere. Su 29 de su mese de santandria, su programma at a allegare de is testimonias de is fèminas chi ant connotu sa violèntzia e ndi sunt essidas; dd’ant cuncordadu a manos de pare cun is tzentros contras a sa violèntzia.
In Bauladu puru, su 25 de su mese de santandria, ddoe ant a fàghere “Boghes de s’iscuriu” (a is ses e mesu de merie, in su tzentru sotziale). S’atòbiu ponet a pare arte, literadura e dantza pro responsabilizare in contu de sa violèntzia de genere. A s’abreu cuncordadu dae su Comunu e dae su sistema Bibliotecàriu Montiferru, ddoe ant a pigare parte artistas de su logu e, intra de is àteros, b’at de marcare sa presèntzia de sa campiona de dantza paralìmpica Marta Concas.
In Bobadri, amministradores e tzitadinos ant a donare pubas rujas peri sa carrera provintziale, pro responsabilizare in contu de sa violèntzia. Ònnia puba at a tènnere unu messàgiu chi allegat de is diritos de sas fèminas.
Pro acabbare, Conad Nord Ovest, a manos de pare cun s’EIF e D.i.Re, at fatu mòvere una campagna de bonucoro pro agiudare is tzentos contras a sa violèntzia. Ant fatu unu porta-crae sìmbulu de rispetu e emancipatzione feminile, e su guadàngiu chi nd’at a essire de sa bèndida sua dd’ant a donare a is assòtzios chi agiudant a is fèminas vìtimas de violèntzia.
Custos abreos tenent sa punna de promòvere unu cambiamentu culturale, pro fàghere a manera chi sa violèntzia contras a sas fèminas no abarret prus unu crìmine disconnotu e mudu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
