S’impignu de su Comitadu aristanesu de sa Rughe Ruja Italiana – Annu nodiu, su 2024, pro sa Rughe Ruja Italiana: ocannu si festat su de 160 anniversàrios dae candu dd’ant fraigada.
Che a àteras tzitades italianas, Aristanis puru podet contare subra de sa presèntzia de unu comitadu tzitadinu, chi, ghiadu dae su presidente Fabrizio Piras, promovet, in totu sa provìntzia, abreos noos: dae sa preventzione, a s’educatzione a sa salude, finas a su contivìgiu de is emergèntzias.
S’ùrtima dd’at acasagiada s’aeroportu de Fenosu, in ue ddoe ant fatu un’esertzitatzione de amparu tzivile pro duas dies: at permìtidu de averiguare is modellos de interventu e, si acontesset carchi apretu, is risorsas de su logu.
Sos voluntàrios si sunt postos a proare s’abilesa issoro in unu muntone de situatziones de arriscu, impreende trastos de cale si siat genia puru.
Sa Rughe Ruja, in sa leada, s’impignat cun is letziones de informu puru: sa letzione imbeniente s’at a fàghere su 22 de su mese de santandria a is ses de merie, in su fàbbricu polivalente de Narabuìa e at a pertocare sa seguresa alimentare in s’interis de s’istitamentu. Is voluntàrios ant a ispiegare, a is interessados, s’importu de ismenguare a pagu a pagu su màndigu pro punnare a istitare a is pipios e sa manovra sarvavida in edade pediàtrica, cun s’agiudu de sa biòloga e nutritzionista Ilaria Dalla Riva.
Cun su cumentzu de s’annu nou de iscola, intamen, sos voluntàrios de sa Rughe Ruja aristanesa ant fatu tapa in is iscolas de sa provìntzia puru, cun letziones de primu sucursu de base in s’Istitutu tècnicu “Lorenzo Mossa” de Aristanis e in sa Segundària de primu gradu de Arborea.
De regordare, a s’acabbu, ca pro sighire sa faina de importu cosa sua, su Comitadu de Aristanis de sa CRI est semper in chirca de agiudos noos: gasi sa setzione tzitadina est imbucada a su sotzial Tik Tok, unu sotzial semper prus connotu e apretziadu dae is giòvanos, pro fàghere a manera de apretare is generatziones noas cun vìdeos chi a manera discansosa mustrant is fainas de ònnia die.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
