Sos addòbios de custa coa de chida in provìntzia de Aristanis – Custa coa de chida sunt paritzos sos addòbios in provìntzia. In Aristanis si comintzat dae s’isport, chenàbura sero cun sa prima partida de s’istajone in su palasport San Nicola pro sa Kadoššéne contra de s’Arrùbia de Arrolli in sa segunda die de sa Coppa Italia de Sèrie D de fùbalu a 5. Sàbadu a mangianu, imbetzes, s’at a fàghere su cunvegnu “Ars Publica in Re Publica” in s’Hospitalis Sancti Antoni e domìnigu un’apuntamentu nou de sa de XV rassìgnas “Domenica in Concerto” de s’Ente pro sos Cuntzertos. In su palcu de su Museu Diotzesanu, su chiterrista giovaneddu Raffaele Putzolu cun su recital “Virtuosismos cun sas ses cordas”.
In Marrùbiu, imbetzes, torrat sa Paschixedda Marrubiesa: a pustis de sa letura de eris de su bandu, sàbadu comintzat a manera ufitziale su calendàriu de apuntamentos finas a domìnigu, pro duas dies dedicadas a sos sabores e a sas traditziones.
B’est finas sa de oto editziones de Artes e Sabores in Santu Lussurzu. Sa die, aprontada dae su Tzentru cummertziale naturale “Bantzigallelle” e dae s’Amministratzione comunale, cun s’agiudu de una cambarada de traballu formada dae sos esponidores, s’at a fàghere sàbadu e domìnigu e at a permìtere a sos bisitadores de fàghere unu biàgiu in sos sabores e in sas artes chi rapresentant su territòriu.
In Paulle, imbetzes, su de duos apuntamentos de sas propostas “Nimancu una in mancu”: chenàbura su cunvegnu “Unu cunfrontu a boghes meda. Tres vidas, tres testimonias, tres vidas noas”, cun sas testimonias de fèminas vìtimas de abusos, a incuru de s’Assòtziu Cuore Straordinario. Ant a intervènnere su Tzentru Antiviolèntzia “Donna Eleonora” de Aristanis e su Tzentru Antiviolèntzia “Fèminas” de sos àmbitos PLUS de Seddori e de Gùspini.
In ùrtimu, protagonista s’isport domìnigu cun sa manifestatzione “Arruinas … bidda chi cheret bìvida”. B’at a èssere sa projetzione de su film chi faeddat de Gigi Riva intituladu “In su chelu nostru unu retumbu de tronu” in su tzentru sotziale.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
