Sa provìntzia de Aristanis faghet sos contos cun s’amiantu – Dae sa periferia de Aristanis a su lagu Omodeo, sa presèntzia de amiantu in sa provìntzia sighit a minetzare sa salude pùblica. In Aristanis, in Brabau acanta a sa tunda andende cara a su ponte, ddoe at unu fàbricu isbandonadu cun unu muntone de cosa de amiantu. Dd’at fatu a ischire s’Assòtziu regionale de sos chi sunt istados espostos a s’amiantu, chi at retzidu avisos meda dae sos tzitadinos pistighingiados.
No est prus pagu grave sa situatzione acanta a su lagu Omodeo, in territòriu comunale de Ula, in ue su matessi Assòtziu at sinnaladu unu de sos muntonàrgios abusivos in ue ddoe podet àere amiantu: inoghe, difatis, nch’ant fuliadu fògios meda de eternit.
A prus de pregontare impresse interventos de bonìfica pro custu giassu, s’assòtziu at propostu de fàghere “unu progetu regionale amiantu, cunformas a su chi narat sa lege regionale 22/2005 chi previdit resursas finantziàrias de dare a sos tzitadinos pro nche bogare s’aminatu sena de ispèndere dinari, dende agiudos pro torrare a fraigare sas coberturas iscobertas”.
Sa pròpia cosa, chi previdiat de fàghere unu pianu pro sas bonìficas e pro nde leare s’amiantu dae fàbricos pùblicos e privados, dd’aiant proposta in ocasione de sa “Die mundiale de sas vìtimas de s’amiantu”, su 23 de abrile passadu.
Sa cunfirma de una sensibilidade manna pro custos problemas chi s’istiu passadu aiat fatu nàschere una faina de importu in favore de sa preventzione pro patologias graves in sos chi aiant traballadu in cuntatu cun s’amiantu: sa Asl de Aristanis aiat abertu su caminu in s’Ìsula pro unu progetu annoadore a livellu mundiale, si naraiat ARRDIA ((Asbestos Related Respiratory Diseases in Industrial Areas). Est istada sa prima chi, a una chimbantina de persones residentes in su territòriu, ddis at fatu una filera de test pro chircare sos chi si narant “marcadores cabudàrgios”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
