Novas Aristanesas, mèrcuris 28 de austu de su 2024
Crònacas dae sas prajas aristanesas – Nointames sos logos de mare siant mentovados pro sas dies de disaogu e de ispàssiu in sas prajas, non mancant sas novas dadas dae residentes e bagnantes in contu de su malu funtzionamentu e de sos problemas tìpicos de s’istiu.
Movimus dae Abarossa, in ue sa corte de sa barraca Martini Beach cun su tempus s’est furriada a èssere unu muntonàrgiu in campu. Tropu maleducados nd’ant abusadu dae cando est serradu: su locale difatis no at mai torradu a abèrrere a pustis mortu su mere in su mese de santugaine coladu.
Avèrtidu de su segrestu chi bi fiat, su Comune de Santa Justa at avisadu a sos chi como tenent s’apaltu, chi sas dies in fatu si sunt incarrigados de torrare a pulire su disacatu fatu dae gente sena criantza, faghende prus dèchida cussa parte de litorale.
In sas costeras de Sinis sighit imbetzes sa chi oramai si narat “gherra de sos umbrellones marca-postu”: dae sas prajas de Santeru finas a Santu Giuanne de Crabas, tantos bagnantes lassant umbrellones e cadreas de mare in su litorale totu die, pro agatare logu lìberu in ue pònnere s’asciugamanu issoro.
In Funtana Mèiga in sas ùrtimas dies sunt istados paritzos sos bisitadores e residentes chi sunt essidos male de contos, cun unu muntone de multas a chie totu at parchegiadu fora dae sas àreas destinadas, giai totu ocupadas. Sos abitantes de sa bidditzola marina de Crabas ant denuntziadu sa mancàntzia de logu pro totus, a su puntu chi at retzidu sa multa finas una fèmina gràida manna, obligada a parchegiare subra unu martzapiedia pagu tretu dae domo sua.
In Is Arutas imbetzes at fatu arrennegare una cartolina fea imbàtida in sas dies de Mesaustu: gente meda at detzisu de non si nche leare s’arga a domo, lassende.la subra sos muros de sa praja. A su Comune de Crabas l’est tocadu a pulire, ammentende chi est assolutamente proibidu su lassare s’arga in oros de mare.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
