Novas Aristanesas, martis 24 de cabudanni de su 2024
Is chistiones de su traballu in provìntzia de Aristanis – Sunt 1.185 sos infortùnios in su traballu denuntziados in su 2023 in provìntzia de Aristanis e 1.131 sas signalatziones de maladia professionale chi at retzidu s’Inail in su matessi annu. Non sunt ancora essidos sos datos pro su 2024, ma sunt giai duas sas vìtimas mortas traballende.
Sunt intra de sos resurtados presentados in s’addòbiu de s’Osservatòriu de sos infortùnios in su traballu e de su traballu cuadu, chi at cunvocadu eris su prefetu de Aristanis, Salvatore Angeri, in ue fiant presentes sos rapresentantes de sas fortzas de s’òrdine, de s’Inps, de s’Assessoradu regionale a su Traballu, de s’Inail, de sa Provìntzia de Aristanis, de sa Camera de Cummèrtziu de Casteddu- Aristanis, rapresentantes de sos sindacados e de sos assòtzios de categoria.
In s’addòbiu ant analizadu fintzas sas fainas de vigilàntzia. In sos primos 8 meses de su 2024, su Nùcleu ispetivu de sos Carabineris de su traballu de su Cumandu de Aristanis at controlladu 203 cuntratos de traballu, agatende 24 violatziones, acapiadas totus a traballos sena respetu de règula peruna. Sunt 60 sas siendas controlladas e 41 sas contraventziones postas chi arribant a 165 mìgia èuros in totu, 10 sas atividades e 2 sas trampas bogadas a campu, pro àere leadu a traballare a extracomunitàrios sena de permissu de sogiorno.
“Nch’at bisòngiu de formatzione”, at naradu su prefetu Angeri, “e dae sos controllos nde sunt essidas a campu irregularidades meda in sos logos de traballu e sa cunfirma chi esistit su traballu sena de respetu de sas règulas e maneras illegales de chircare traballadores. Ddoe at situatziones in ue sunt ancora faghende controllos”.
Su prefetu Salvatore Angeri at fatu a ischire ca s’est pensende de fàghere diventare s’Osservatòriu in su traballu un’istrutura permanente.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
