Novas Aristanesas, chenàbura 18 de mese de ledàmene de su 2024
Sa provìntzia de Aristanis protagonista in sa moda e in su design – A pustis de s’istilista de S’Alighera Antonio Marras, como tocat a sa giòvana fashion designer casteddaja Giorgia Bistrusso: sa trama de is tessutos de sa moda e su design fitianu s’acàpiant a sa leada de sa provìntzia de Aristanis. Giorgia Bistrusso, in sa colletzione noa sua, at bòfidu ammentare is traditziones sardas antigas e, pro fàghere custu, est torrada cun sa mente a candu, a pipia, in domo de sa giàia, in Làconi, aiat imparadu s’arte de su recamu e unas cantas tècnicas de tessìngiu.
Is ùrtimas colletziones suas de bussas – sunt, onniuna, ùnica e numerada – nde sunt sa cunfirma. S’istilista de S’Alighera sighit a contare, issu puru, unu acàpiu chìrdinu cun sa terra anca est nàschiu, pro mèdiu de su limbàgiu de sa moda e de s’arte. Issu puru at bòfidu contare su logu de Aristanis cun s’arte sua. S’ùrtima colletzione sua de atòngiu–ierru 2024 posta a cùrrere in sa Milano Fashion Week, dd’at meledada pensende a sa giuighissa Lionora de Arbaree. A nàrrere sa beridade, s’istilista de S’Alighera, in su 2021, aiat mustradu, in Milano etotu, sa bellesa aristanesa cun sa colletzione beranu–istadiale, presentada pro mèdiu de unu vìdeu fatu in su Monteferru, logu chi aiat connotu una bella passada de fogu, passadu peri sos montes e lòmpidu finas a su mare e chi, pro neghe de su fogu, aiat tramudau èteros de matas in chinìsiu.
Su traballu de Marras prus fitianu est istadu custu istadiale, in sa bidda de Santu Sarbadore de Sinis. Inoghe, intra guturinos prenos de giarra, ant fatu su shooting fotogràficu de sa colletzione Pre Fall WInter de s’istilista sardu, chi tenet a tìtulu “Nativos Sardos”. Is bestires ponent a pare sa comunidade sarda e cudda de sos nativos americanos de is Istados Unidos, chi, in su 1981, Fabrizio de Andrè aiat cantadu in unu album autobiogràficu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
