Novas Aristanesas, mèrcuris 24 de mese de argiolas de su 2024
Si faghent is contos de s’Istadiale de Mont’’e Prama – Sunt 16.450 is pessones chi ant pigadu parte a is addòbios de sa Fondatzione Mont’’e Prama in istadiale, un’istadiale fata de tzelebratziones longas in onore de is 50 annos dae candu aiant agatadu is istàtuas de is Gigantes, in die de oe famadas in totu su mundu e chi si sunt furriadas a èssere sìmbulu de Sardigna.
Totu s’est acabbadu cun unu bilàntziu bellu meda: ddoe fiant tres fèstival de archeologia, literatura e tzìnema, duos cuntzertos de mùsica jazz, duos de mùsica pop, duos de mùsica lìrica e clàssica; una rapresentatzione teatrale, s’ispetaculu mannu de dantza de Roberto Bolle e is duos cuntzertos de sa cantante Fiorella Mannòia, chi ant fatu contare su totu prenu a pagu oras dae candu ant postu a bèndere sos billetes.
Non sunt mancados unu nùmeru istremenadu de momentos culturales cun prus de 60 addòbios, partzidos intra cunferèntzias, proietziones tzinematogràficas, presentadas de libros, cuntzertos e sonadas de musitzistas.
Su programma at postu in mesu unu muntone de logos de su coro de sa provìntzia de Aristanis: sa leada archeològica de Tharros, Santu Giuanne de Sinis, su museu tzìvicu “Giovanni Maròngiu” de Crabas, sa pratza de sa Sea de Aristanis, su nuraghe Losa de Abbasanta e su palatzu Àymerich de Làconi.
“Una sutzessu prus mannu de cuddu chi aiaus pensadu”, at nadu su presidente de sa Fundatzione Mont’’e Prama, Ànthony Muroni. “Pro su chi pertocat su pranu organizativu podimus nàrrere ca sa màchina at funtzionadu a manera ispantosa, e una presèntzia aici istremenada si podiat pensare, ma non fiat iscontada. S’isfida de su teatru nou de Tharros, chi s’agatat no in logu aprigau, dd’amus binta etotu e oe cuddu palcu intra is ruinas e su mare, in unu cuntestu ùnicu in su Mediterràneu, est unu intra is prus chi domandant sos artistas natzionales e internatzionales. Sos faeddos de grandos isteddos famados che a Roberto Bolle e Fiorella Mannòia si prenent de preju, pro ite ca sa penìsula de Sinis s’est furriada a èssere una bidriera chi ingenerat bellesa e richesa”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
