domenica, 23 Febbraio, 2025

Novas Aristanesas, mèrcuris 17 de ghennàrgiu de su 2024

Sos isportivos de sa provìntzia de Aristanis – Finas cun s’intrada de s’annu nou sa provìntzia de Aristanis sighit a si seberare pro su talentu contivigiadu in sas sotziedades isportivas suas: chi siant giogadores de fùbalu, tennistas, nadadores o lotadores, sos atletas sunt sighende a imbàtere a resurtados bonos meda.

Sos atletas aristanesos de Èolo nde sunt torrados dae sos Campionados italianos de tennis de plaja in logu ammuntadu, giovanile e subra de sos 40 annos, balangende sa bellesa de deghe medàllias.

S’est distinta Angelica Vilecco, chi in sa categoria suta sos 16 annos at balangiadu una medàllia de oro in su dòpiu feminile cun sa cumpàngia Ilaria Cuozzo, un’àteru primu postu in su dòpiu mistu e una medàllia de prata gioghende a sa sola. Su de tres postos a sa sola l’at otentu Cuozzo. Sunt imbàtidas a su de tres postos sa còpia Ilària Corona e Alessia Cucco, Elena Pinna e Ilaria Corona. Su de tres postos intro de sos isportivos cun prus pagu de 18 annos pro Saniele Olla e subra de sos 40 medàllia de brunzu a Diego Fratini e Lucia Cusinu.

Cuntentesa manna finas pro sa sotziedade aristanesa Golden Rule, cun sos atletas suos chi si sunt distintos in Tàtari in sos Muay Thai Explosion. Parègiu pro sos pitzinnos Matthias Deidda e Simone Deidda de Aristanis e bìnchida pro Lorenzo Di Matteo e Gabriele Chirra de Santa Justa, Silvio Pulisci de Aristanis e Manolo Còlomo de Duarche. E si Giorgio Gattus de Arborea in sa proa nd’est essidu bìnchidu, su paesanu suo Gian Nicola Mèlinu est resurtadu a paregiare.

Abbaidende a su chi ant fatu sos nadadores, s’aristanesa de deghessete annos Valeria Zucca nd’est torrada dae su Campionadu regionale de nadadura lìbera in logu ammuntadu cun una medàllia de brunzu in sa categoria Cadette, pro sa cuntentesa de sa sotziedade All Together.

In ùrtimu unu pagu de talentu aristanesu at a imbàtere a Gaddura: Lorenzo Castagna, tertzinu de 18 annos de Aristanis, at a giogare in sa formatzione suta de sos 19 annos de su Terranoa Fùbalu. Su pitzocu s’est seberadu pro su talentu in su setore giovanile de Simba, iscuadra prammaresa de su giogadore de fùbalu iscadidu Gianfranco Matteoli.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.

Redazione2
Redazione2

LASCIA UN COMMENTO

Inserisci il tuo commento!
Inserisci qui il tuo nome

For security, use of Google's reCAPTCHA service is required which is subject to the Google Privacy Policy and Terms of Use.

ULTIME NOTIZIE

Novas Aristanesas, martis 31 de nadale de su 2024

Festas e dies de ponte in su 2025  – In su 2025 isceti sa festa de Totu is Santos at a resurtare in sàbadu e sa de su Regordu de is Mortos in domìnigu. Is àteras festas ant a acontèssere, imbetzes, a intro de chida, donende bortas meda s’ocasione pro si pasare e pro allonghiare is fèrias.

S’annu at a cumentzare cun sa Prima die, chi at a resurtare in mèrcuris, sighidu dae sa Festa de is Tres Rees, chi at a èssere in lunis. Su 25 de abrile at a èssere in chenàbura, mentras su 1 de maju in giòbia. In làmpadas, sa Festa de sa Repùblica at a acontèssere unu lunis, mentras sa Festa de Mesaustu at a resurtare in chenàbura. Totu is Santos, comente amus naradu, at a resurtare in sàbadu, mentras Sa Purìssima at a èssere in lunis. Paschighedda de su 2025 at a èssere in giòbia, mentras sa die in fatu, Santu Istèvene, at a èssere in chenàbura.

Connoschende is datas, faghet a si programmare carchi die de “ponte”. Su primu ponte diat pòdere èssere giai a primìtzios de annu, pro sa Festa de is Tres Rees (su 6 de ghennàrgiu), chi est unu lunis, allonghiende sa coa de chida fintzas a martis 7 de ghennàrgiu. Un’àtera ocasione bona si presentat in beranu, gràtzias a sa cumbinatzione intra de sa Festa de sa Liberatzione (su 25 de abrile, una chenàbura) e sa Festa de is Traballadores (sa prima die de maju, chi est una giòbia). Cun a penas bator dies de fèrias (dae su 28 de abrile a su 2 de maju), si diat pòdere gosare de sa bellesa de deghe dies de vacàntzia, dae su 25 de abrile a su 4 de maju. 

In làmpadas, sa Festa de sa Repùblica (2 de làmpadas, unu lunis) oferit un’àteru ponte de tres dies, bellu pro si pasare in antis de is vacàntzias de s’istadiale. Mesaustu (su 15 de austu, in chenàbura) at a assegurare una coa de chida de tres dies, bella pro chie podet andare a mare o a monte.

S’8 de nadale puru, die de Sa Purìssima, est unu lunis, allonghiende sa coa de chida in antis.

Is festas de Paschighedda, chi in su 2025 at a acontèssere una giòbia, ant a permìtere de si pasare fintzas a domìnigu 28 de nadale. Ma, pighende carchi die de fèrias, si podet perlongare sa vacàntzia fintzas a s’Annu Nou, isfrutende totu is festas. 

Cun custas datas, duncas, su 2025 chi amegat de intrare oferit unas cantas possibilidades pro si programmare carchi vacàntzia in prus e, comente si siat, pro si pasare.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.

Tutte le notizie

Contatti: posta@oristanonoi.it

OristanoNoi: gli eventi, le storie, i volti di Oristano. Noi | OristanoNoi - Iscrizione al Registro della Stampa del Tribunale di Oristano numero 2577 del 27.12.2019 - Direttore responsabile Marco Enna - Edito da Radio Cuore di Giovanna Maria Fenu & C. sas – Oristano – Partita Iva 00619690951 - Hosting provider Aruba Spa, Via San Clemente, 53 – Ponte San Pietro – 24036 (BG) – P.I. 01573850516

© Newspaper Theme | All rights reserved