Istitutziones, iscolas e fortzas de s’òrdine contras de sa violèntzia de gènere – In sa die de eris – 25 de santandria – istitutziones e assòtzios de sa provìntzia de Aristanis si sunt aunidos pro nàrrere sa pròpia cosa: ca nono a sa violèntzia contras de sas fèminas.
Sunt meda difatis sas fainas chi ant cuncordadu in sos diferentes Comunes. In Marrùbiu sa comunidade est essida peri sos caminos pro leare parte a una fiaculada de sensibilizatzione, in Arriora ant postu un’àtera panchina ruja, sìmbulu de sa gherra contras a custu fenòmenu, chi ant tintu sos giòvanos de sa bidda.
In Aristanis protagonistas sas iscolas puru: in s’Istitutu superiore industriale Othoca unas cantas classes ant agabbadu su percursu chi nche leat a sa colunna ruja, sìmbulu de sa gherra contras a sa violèntzia. In s’Istitutu magistrale “Benedetto Croce” ant cuncordadu sa faina “Se ami non uccidi! Se ami non ferisci. Basta!”, cun una die de meledu pro creare un’ambiente iscolàsticu in ue bìvere paris totus in paghe.
S’Arma de sos Carabineris e sa Politzia de Istadu puru ant fatu sa parte issoro.
Su cumandu provintziale de sos carabineris at aderidu a sa campagna internatzionale de sas Natziones Unidas “Orange the World”: pro dare unu sinnale de solidariedade a sas vìtimas de violèntzia, ant illuminadu sa sea in colore de aràngiu. In prus in su giassu istitutzionale de s’Arma ant publicadu su violentzametru, un’aina de agiudu a sas fèminas pro cumprèndere mègius sos sinnales de abusu, cun cussìgios ùtilosos pro comente si iscrufère.
Sa Politzia de Istadu at annoadu imbetzes su protocollu de su progetu “Zeus” cun su CAM, su Tzentru pro iscurtare òmines chi tratant male, chi leat in càrrigu e curat sos responsàbiles de violèntzia de gènere.
Comente at fatu ischire sa Cuestura, dae su cumintzu de s’annu a su 20 de santandria passadu sunt istadas 137 sas denùntzias arribadas a sa sea de Aristanis, ponende sa provìntzia in sos primos postos in Sardigna.
Tocat a sinnalare, in fines, su presìdiu in pratza de Lionora, coordinadu dae su Comune de
Aristanis.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
