Su cummèrtziu in provìntzia de Aristanis e sas bèndidas a baratu – B’at tempus ancora pro comporare sena ispèndere meda: finas a primos de martzu sighint in s’Ìsula sos imbaratamentos de ierru cun tantas bèndidas a baratu de fine de istajone.
E pro comporare in manera segura s’Adiconsum regionale at publicadu carchi cussìgiu ùtilosu pro iscumproare si su billeteddu de su prètziu portat iscritu cantu est s’iscontu, e su prètziu finale totale; non tocat a si fidare de imbaratamentos esagerados e cheret controlladu semper chi sa roba posta in bidriera siat sa matessi chi est in intro de sa butega.
Su càmbiu de su produtu est a voluntade de su butegheri, a mancu chi non siat difetosu: si est gasi, est obligadu pro lege a lu cambiare, imbetzes chie còmporat tenet duos meses de tempus pro lu signalare.
Su tempus de sas bèndidas a baratu podet èssere pro seguru un’ocasione bona pro chi si nde torret a pesare su setore de su cummèrtziu chi in provìntzia de Aristanis, a su chi narant sos datos de Infocamere, est in suferèntzia. Si in su 2023 sas impresas de servìtzios in provìntzia ant registradu una crèschida de su 2,37%, a dolu mannu non si podet nàrrere su matessi pro su cummèrtziu a s’ingrussa e a minudu.
A su chi narant sos datos, a su 31 de nadale de ocannu passadu, sas impresas de servìtzios registradas sunt 3.303 contra de sas 3.244 de su 2022. Sunt creschende finas sas impresas de aporridura e de posada, passadas dae 1.135 a 1.147 e su setore finantziàriu e assegurativu chi cun 13 impresas noas nch’est artziadu dae 181 a 194. A s’imbesse, su nùmeru de sas impresas cummertziales, chi giai in su 2022 nche fiat caladu de su 0.46%, in su 2023 at minimadu ancora, passende dae 3.231 a 3.129.
Su chi faghet dannu sunt sas bèndidas online, comente cunfirmat sa diretora de Confcummèrtziu Aristanis, Sara Pintus: “Chie non s’organizat e non diversìficat sos servìtzios intrat in suferèntzia. Giai dae tres annos semus connoschende una punna a s’agiornamentu digitale de sas impresas e a sos investimentos in sas bèndidas in lìnia. Semus però in mesu de una mudadura culturale chi at a tènnere bisòngiu de tempus”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
