In ammentu de Mauro Ferreri – Sunt passados unos cantos annos dae sa morte de su pintore Mauro Ferreri e sa tzitade sua, Aristanis, chi nde allogat su regordu semper biu, ddi dèdicat una mustra. Dda cuncordant sa Fundatzione Aristanis e s’Assessoradu de sa Cultura e de su Turismu de su Comune de Aristanis. Su tìtulu est “Is rughes de Mauro Ferreri”. Is òperas s’ant a pòdere bìere in is locales de s’Ufìtziu pro is informos de s’Assessoradu regionale de su Turismu, Artesanadu e Cummèrtziu, in pratza de Tzitade.
Is pinturas, chi arribant totus dae colletziones privadas, rapresentant su tema de sa Chida santa. Sunt tres ponimentos in rughe, una prufessone e unos cantos disinnos. Cun custu sèberu s’est bòlidu regordare unu produsimentu de Ferreri chi medas non connoschent. Is ponimentos in rughe sunt de is annos ‘70 e ’80, sa prufessone est de su 2001. In is cuadros prus betzos si biet Ferreri chi proat tècnicas e istiles chi at a abbandonare in is produsimentos suos de a pustis, prus nòdidos. In una pariga de òperas si biet crara s’influèntzia de is grandos maistros aristanesos de su ‘900.
In sa mustra si podet bìere unu ponimentu in rughe chi su pùblicu aiat giai bidu in su 1975 in sa Pinacoteca “Carlo Contini”, in sa prima mustra personale de Mauro Ferreri, presentada dae su pintore Dino Fantini e chi nde aiat faeddadu fintzas Peppeto Pau, e duos ponimentos in rughe mai mustrados in logu pùblicu. Una de custas òperas dd’ant agatada dae pagu tempus in un’armàdiu chi fiat de s’artista.
S’intrada a sa mustra est lìbera. Faghet a dda bisitare in is oràrios de abertura pro su pùblicu de s’Ufìtziu pro is informos turìsticos: a mangianu dae is deghe a sa una; a merie dae is tres a is ses.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
