lunedì, 24 Febbraio, 2025

Novas Aristanesas, giòbia 9 de maju de su 2024

Tres dies de addòbios in provìntzia de Aristanis

Tres dies de addòbios in provìntzia de Aristanis – Tres prendas de connòschere de su patrimòniu artìsticu e paritzos addòbios culturales. In provìntzia de Aristanis sa coa de chida si presentat prena de apuntamentos.

Si comintzat cras, chenàbura 10 de maju, cun sa presentada de su libru “Raccontami” de Pietro Marongiu a sas 6 de sero in su Tzentru Servìtzios Culturales UNLA de Aristanis. Sabrina Sanna at a faeddare cun s’autore e Paolo Vanacore si-nd’at a incurare de sas leturas.

Semper in Aristanis, sàbadu 11 e domìniga 12 de maju b’est s’apuntamentu tzitadinu de Monumentos Abertos in cumpangia de sos alunnos de sas iscolas e de sos voluntàrios. S’ant a pòdere bisitare logos e monumentos meda e in prus partetzipare a paritzas initziativas a tema. S’elencu cumpletu si podet agatare in monumentiaperti.com. A sos monumentos si bi podet intrare sena pagare dae sas 9,30 a sas 13 e dae sas 15,30 a sas 19.

Sàbadu dae sas 10,30, in sa crèsia de su Cramu b’est finas sa rassigna musicale “Notas de classe in su Cramu”, cun sos alunnos de sas iscolas segundàrias de 1u e 2u gradu a indiritzu musicale de s’Iscola tzìvica de mùsica tzitadina, s’Istitutu cumprensivu de Crabas e sos voluntàrios de su Touring Club.

A sero, imbetzes, s’archi-pìscamu emèritu Ignazio Sanna at a presentare su libru suo “Testimoni d’eterno nel tempo. Le sfide attuali dell’antropologia cristiana” a sas 18,30 in s’auditòrium Santu Domìnigu.

E non solu: oe e cras, in sa domo pro fèrias Stella Maris de Turre Manna, si festant sos 70 annos dae cando ant fundadu su Masci, Movimentu de Adultos Scout Catòlicos Italianos, cun duas mesas temàticas, mentres in Samugheo sàbadu in su Museu MURATS a sas 18,30 comintzat sa mustra “Ti ses bestida de biancu”, a incuru de Anna Rita Punzo, dedicada a sa poetissa Pippa Bacca.

Sa matessi die, ma in Crabas, s’apuntamentu est imbetzes cun s’ammentu “Sa Passione de Cristos”, a incuru de sa Shams Academy de Aristanis, in collaboratzione intre sas parròchias de Crabas e sa Fundatzione Mont’ ‘e Prama, cun s’agiudu de su Comune de Crabas. Su sero at a comintzare cun sa presentada de su libru de Mussegnore Ignazio Sanna, a sas 21, in pratza Istagnu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22. 

Red
Red

LASCIA UN COMMENTO

Inserisci il tuo commento!
Inserisci qui il tuo nome

For security, use of Google's reCAPTCHA service is required which is subject to the Google Privacy Policy and Terms of Use.

ULTIME NOTIZIE

Novas Aristanesas, martis 31 de nadale de su 2024

Festas e dies de ponte in su 2025  – In su 2025 isceti sa festa de Totu is Santos at a resurtare in sàbadu e sa de su Regordu de is Mortos in domìnigu. Is àteras festas ant a acontèssere, imbetzes, a intro de chida, donende bortas meda s’ocasione pro si pasare e pro allonghiare is fèrias.

S’annu at a cumentzare cun sa Prima die, chi at a resurtare in mèrcuris, sighidu dae sa Festa de is Tres Rees, chi at a èssere in lunis. Su 25 de abrile at a èssere in chenàbura, mentras su 1 de maju in giòbia. In làmpadas, sa Festa de sa Repùblica at a acontèssere unu lunis, mentras sa Festa de Mesaustu at a resurtare in chenàbura. Totu is Santos, comente amus naradu, at a resurtare in sàbadu, mentras Sa Purìssima at a èssere in lunis. Paschighedda de su 2025 at a èssere in giòbia, mentras sa die in fatu, Santu Istèvene, at a èssere in chenàbura.

Connoschende is datas, faghet a si programmare carchi die de “ponte”. Su primu ponte diat pòdere èssere giai a primìtzios de annu, pro sa Festa de is Tres Rees (su 6 de ghennàrgiu), chi est unu lunis, allonghiende sa coa de chida fintzas a martis 7 de ghennàrgiu. Un’àtera ocasione bona si presentat in beranu, gràtzias a sa cumbinatzione intra de sa Festa de sa Liberatzione (su 25 de abrile, una chenàbura) e sa Festa de is Traballadores (sa prima die de maju, chi est una giòbia). Cun a penas bator dies de fèrias (dae su 28 de abrile a su 2 de maju), si diat pòdere gosare de sa bellesa de deghe dies de vacàntzia, dae su 25 de abrile a su 4 de maju. 

In làmpadas, sa Festa de sa Repùblica (2 de làmpadas, unu lunis) oferit un’àteru ponte de tres dies, bellu pro si pasare in antis de is vacàntzias de s’istadiale. Mesaustu (su 15 de austu, in chenàbura) at a assegurare una coa de chida de tres dies, bella pro chie podet andare a mare o a monte.

S’8 de nadale puru, die de Sa Purìssima, est unu lunis, allonghiende sa coa de chida in antis.

Is festas de Paschighedda, chi in su 2025 at a acontèssere una giòbia, ant a permìtere de si pasare fintzas a domìnigu 28 de nadale. Ma, pighende carchi die de fèrias, si podet perlongare sa vacàntzia fintzas a s’Annu Nou, isfrutende totu is festas. 

Cun custas datas, duncas, su 2025 chi amegat de intrare oferit unas cantas possibilidades pro si programmare carchi vacàntzia in prus e, comente si siat, pro si pasare.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.

Tutte le notizie

Contatti: posta@oristanonoi.it

OristanoNoi: gli eventi, le storie, i volti di Oristano. Noi | OristanoNoi - Iscrizione al Registro della Stampa del Tribunale di Oristano numero 2577 del 27.12.2019 - Direttore responsabile Marco Enna - Edito da Radio Cuore di Giovanna Maria Fenu & C. sas – Oristano – Partita Iva 00619690951 - Hosting provider Aruba Spa, Via San Clemente, 53 – Ponte San Pietro – 24036 (BG) – P.I. 01573850516

© Newspaper Theme | All rights reserved