Unu murale in Turre Manna – Sa muralla de su portigheddu de Turre Manna s’est fata prus bella gràtzias a unu murale pintadu dae is istudiantes de su Litzeu artìsticu de Aristanis. S’idea est nàschida gràtzias a collaboratzione intra de su De Castro de Aristanis e is Marinas Aristanesas e at permìtidu de acumprire su progetu chi at at fatu parte de is fainas in programma pro s’annu de iscola acabbadu. Sa cunfirma est arribada dae su dirigente, Pino Tilocca.
Su Litzeu clàssicu, imbetzes, at sighidu sa collaboratzione cun su Fèstival Librevento de Igrèsias. Si previdit fintzas sa partetzipatzione a su Prèmiu Morrione, unu cuncursu in contu de su giornalismu iscruculladore. Su De Castro at a traballare cun sa Caritas e cun s’Osvic e fintzas cun sa Càmera Penale de Aristanis, chi at a contivigiare unas cantas fainas pro resonare cun is dischentes de chistiones de giurisprudèntzia. Una cunventzione noa cun su Cip, in prus, at a interessare a is istudiantes disàbiles de Terraba.
Crabas, Manneddu fùrriat a domo – Manneddu est torradu a Crabas. A su gigante de Mont’’e Prama, torradu a domo sua, nche dd’ant acumpangiadu a sa sala de su Museu tzìvicu Giovanni Marongiu, in ue ddoe sunt is àteras isculturas seberadas pro su primu cuncordu de is Gigantes in sa bidda oru oru de s’istàniu. A Manneddu (193 tzentìmetros de artària e 330 chilos de pesu) dd’aiant postu custu nùmene pro ite ca fiat su prus mannu de is repertos agatados in is annos Setanta de su sèculu passadu e oe est sa prima de is isculturas chi s’agataiant acasagiadas foras dae Crabas chi torrat a domo, a sa terra sua. In sa tzerimònia fata pro sa torrada de Manneddu su sìndigu de Crabas Andrea Abis e su presidente de sa Fundatzione Mont’’e Prama, Anthony Muroni, ant sutaliniadu s’importu de torrare a pònnere paris totu is istàtuas de su cumplessu monumentale crabarissu. Sa diretora de sa Fundatzione at fatu a connòschere a is presentes s’istòria de su gigante.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
