Aristanis, tzitade de cantieris – In Aristanis, unu muntone de traballos est mudende sa tzitade: dae s’assentu de pratza de Manno a su megioru de sa retza ìdrica, a su faghimentu a nou de pratzas de Marianu, is cantieris si bient prus che totu pro su chi pertocat sa tzirculatzione istradale.
Fintzas a s’acabbu de su mese, ddoe at proibimentos de firmada e de tzirculatzione in bia de Cavour, in is tretos in ue ddoe sunt faghende is traballos pro sa retza de s’abba. S’interventu annuntziadu dae Abbanoa pertocat fintzas is bias de Vandalino Casu, Torbeno Falliti e s’arborada de sa Libertade. Ma is retzas ìdricas noas ddas ant a fàghere fintzas in is bias de is Artesanos, Sebastiano Mele, Curreli, de is Maistros de Muru, de is Ferreris, Campanelli e Salvo D’Acquisto.
In pratza de Manno su cantieri est abertu ancoras, ma is proibimentos ddos ant postos fintzas in pratza de Marianu. Difatis, ant a mudare is parchègios e sa viabilidade, cun unu tretu mannu in ue si podet passare a pee isceti. In s’interis, ant suspèndidu is parchègios a pagamentu e is proibimentos de firmada e de parchègiu.
Ma amegant de fàghere traballos urgentes fintzas in su campusantu de Màssama e in s’Informatzitade. intra de Aristanis e Santa Justa sighint is traballos pro pònnere in seguresa is inrugaduras de sa S.P. 56.
In sa zona industriale de sa tzitade ant torradu a abèrrere bia de Parigi e ant abertu fintzas, mancari in parte, sa tunda noa. Sunt acanta de acabbare un’intrada de sa bia provintziale cun is bias in s’intrada de sa bidda de Santa Justa, s’assentu de una corsia de sa carregiada a parte de Est e sa cumplanare. In un’àteru momentu ant a fàghere duas tundas intra de bia de Casteddu e bia de su Portu e intra de bia de Casteddu e bia de Messina.
In fines, contras de s’arriscu de undamentos, ddoe sunt àteros duos progetos in Aristanis: unu in bia de Sardigna, in su tretu intra de sa pratza de is Boes e bia de Càrnia, s’àteru intra de bia de Busache e arborada de Rockefeller. In Turre Manna si prevident cundutas ìdricas noas. E, ancoras, in sa pratza de is Boes sighint is traballos pro acabbare sa pratza, cun sa prantadura de àteras matas e cun s’assentu de is tuleddas pro is frores.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
