Sa provìntzia de Aristanis agradèssida dae is turistas – Acostende s’istadiale, sunt giai medas is turistas chi detzident de bisitare sa provìntzia de Aristanis pro iscobèrrere is bellesas suas, passigende peri is bighinados antigos de biddas e tzitades e bisitende is logos archeològicos prus ammajadores.
In ocasione de su ponte intra de su 25 de abrile e su Primu de maju turistas meda, arribados dae s’Isvìtzera, ant connotu su Sinis e nd’ant apretziadu is bellesas ambientales e archeològicas.
Isbarcados sa chida in antis in Portu Turre, sunt arribados a provìntzia de Aristanis a pustis chi ant bisitadu sa costera orientale e sa provìntzia de Casteddu. A pustis chi ant bidu is prajas de Santu Giuanne e sa tzitade betza de Tharros, custa cambarada de isvìtzeros e de italianos chi bivent in Isvìtzera sunt andados a Bosa, pro acabbare in bellesa su biàgiu issoro in sa terra nostra.
Fiant 2.000, imbetzes, is inglesos e irlandesos de sa “Marella Explorer 2”, sa prima nave de crotziera chi est arribada a su portu de Aristanis – Santa Justa in su 2024.
Sa nave est lòmpida su 2 de su mese de maju e at permìtidu a is turistas britànnicos de connòschere Aristanis, su Sinis, Santa Caderina e su nuraghe Losa de Abbasanta, in antis de torrare a mòvere cara a Malta.
“Semus connoschende is ìsulas de su Mediterràneu”, ant naradu giòbia passada maridu e mugere inglesos de Leeds, “eris a note semus mòvidos dae Maiorca e custu mangianu semus lòmpidos a Aristanis. Est sa prima borta chi benimus a custa ìsula ammajadora. Non dda connoscaiamus, ma totus nos-nde ant faeddadu semper in bonu. Oe amus a bisitare sa tzitade de Aristanis e amus a tènnere s’ocasione de tastare is màndigos lichitosos de su connotu de custa terra”.
S’arribu de sa “Marella” at permìtidu fintzas a is istudiantes de sa 2^ B de s’Istitutu alberghieru de bisitare sa nave e de cumprèndere mègius comente totu diat èssere una carriera in custu setore, ite bolet nàrrere a traballare in su sistema de acasàgiu e in sa coghina de una nave. Is dischentes, chi ddos ant acumpangiados unos cantos professores de s’Istitutu, ant ascurtadu cun atentu mannu is letziones fatas dae is espertos de s’echipàgiu de sa “Marella”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
